quen somos
A Asociación Neria é unha asociación, constituída o 9 de maio de 1992, por iniciativa
dun grupo de alcaldes da Costa da Morte, que viron a necesidade de unir esforzos
para loitar polo desenvolvemento integral da zona.
Ten como actividade principal o desenvolvemento socioeconómico do territorio que
abrangue, loitando polo benestar social dos seus habitantes e pola mellora da súa
calidade de vida. Para iso, encárgase de difundir información, formar e concienciar
a todos os habitantes, e en especial a xuventude, para que poidan labrar un futuro
aquí na nosa terra e non ter que recorrer á emigración.
A Asociación Neria é unha entidade con ampla experiencia no campo do desenvolvemento
rural, dado que este é o seu principal obxecto social: promover e coordinar o desenvolvemento
rural, mellorar as condicións de vida e contribuír a frear a despoboación do territorio
rural. Neste sentido a Asociación Neria foi desenvolvendo cada vez máis actuacións
e abranguendo máis áreas temáticas.
O territorio de actuación da Asociación Neria, que comprende 17 municipios, conta
con infinidade de recursos que é preciso potenciar para favorecer o seu desenvolvemento.
Isto fai necesario seguir fomentando a creación de emprego, tanto por conta propia
como por conta allea, e a iniciativa empresarial.
Neste sentido a Asociación Neria veu realizando durante todos estes anos o seu labor
como motor de iniciativas culturais, sociais, turísticas e económicas, ao longo
de toda a xeografía, e contribuíu de modo vital ao desenvolvemento da comarca e
ao progreso da súa sociedade. Desenvolveu importantes iniciativas, revitalizadoras
propostas e beneficiou o conxunto dos habitantes —dunha ou outra forma— cunha vocación
de servizo social tal e como foi pensada nas súas orixes.
costa da morte
O topónimo Costa da Morte vén da antiga crenza de que Fisterra era a fin da terra
e o punto a partir do cal xa non existía navegación cara ao Oeste. Abrangue dende
Cabo Fisterra ata Malpica.
Segundo a tradición dos antigos gregos e dos celtas, era ademais a rexión onde o
sol desaparece a diario, conducindo a barca de Caronte, cargada coas almas que Hermes
(San Roque) recollía en pequenos templos (ermidas) ao país dos mortos que o Deus-Sol
é capaz de atravesar para aparecer nun novo día.
A Costa da Morte esténdese no noroeste peninsular, comprendendo os municipios de
Cabana de Bergantiños, Camariñas, Carnota, Cee, Corcubión, Coristanco, Dumbría,
Fisterra, Laxe, Malpica de Bergantiños, Mazaricos, Muros, Muxía, Ponteceso, Santa
Comba, Vimianzo e Zas. É unha terra de lendas acerca de cidades sepultadas, de curandeiros
que obran milagres, de supersticións e grandes devocións.
É un territorio salpicado de igrexas románicas, pazos, castelos e monumentos megalíticos
rodeados dunha natureza xenerosa. É o confín de Europa, onde o mar golpea unha paisaxe
de acantilados abruptos, illotes e penedos inmensos que serven de protección natural
a unha terra desexada pola súa riqueza e saqueada, ao longo dos séculos, por viquingos,
piratas, escuadras inglesas e francesas... escenario de naufraxios e afundimentos,
nunha terra que, sobre todo, é símbolo de vida.
Unha terra poboada dende a antigüidade por xente esforzada e xenerosa que soubo
extraer o mellor que unha natureza esixente lle daba e desenvolveu unha cultura,
en torno a ela, que lle fai vivir con intensidade un tempo que se debulla lentamente.
localización
